కనురెప్పల మైదానాల మీద
కలల విత్తనాలు జల్లి
అనుభూతుల పంట పండించింది
నీ ఆగమనం
మనసు పూదోటలో
వసంతాన్ని నెమరువేసేసి
శిశిరంలోకి నిర్దయగా
నెట్టివేసింది నీ వియోగం
ఆనాటి.... ఆ ....ఆనందం…
ఈనాటి ....ఈ ...విషాదం
ఈ రెంటి మధ్య
ఒక ఎడారి ఏకాంత వృక్షం
అదే ………. నేను ……….
నాకు మిగలని నా………అస్తిత్వం
ఈ ఏకాంత ఎడారి వృక్షానికి
నీ ఆలోచనలే ఆకులు
నీ చిలిపి నవ్వులే పూలు
మన అల్లరి ఆశలే పరిమళాలు
కానీ………..
మనసు రహదారి నిండా
శూన్యం నింపింది నీ వియోగ శిశిరం..
మళ్ళీ ఎప్పటికో
ఈ ఎడారికి (నీ) వాసంతం రాక ?
అప్పటివరకూ నా చిట్టి మనసుకు
ఈ విషాదమే శాశ్వతమిక…
No comments:
Post a Comment